Dźens sym połsta dubow sadźił

W ludowym nakładnistwje Domowina je kniha Bena Budarja “Dźens sym połsta dubow sadźił” w modernym wuhotowanju składnostnje jeho 80tych narodnin, kiž by 19. měrca swjećił, na předań. Awtor přeprošuje w njej na literarne pućowanje po šćežkach žiwjenja. Hižo w lěće 2011 wušła kniha twori zakład za nětčiše wudaće, kotrež je Měrana Cušcyna dospołnje znowa zestajiła. Při tym přewza zestajerka wulki dźěl prěnjeje zběrki a wobohaći ju wo dalše basnje a anekdoty z pjera Budarja. Swójba, přiroda, serbska rěč, njewšědne a wšědne podawki su wobłuki, kotrež tworja pódu za schadźenki jeho dubikow. W słónčnych wokomikach zamóža wulkotnje rosć a we wichorojtych časach su kruta zepěra na “tři sta lět a wjace šće”. Krótka biografija awtora, bibliografija a lawdacija k spožčenju Myta Ćišinskeho kaž tež fota ze žiwjenja awtora nowu publikaciju wudospołnjeja a wožiwjeja.